" ကျွန်တော်နှင့်ကြောက်ခြင်း(၄)"

" ကျွန်တော်နှင့် ကြောက်ခြင်း (၄) "
-------------------------------------

ကလောမှာ တာဝန်ထမ်းဆောင်စဉ်တုန်းက မ၀င်သင့်တဲ့ သမီးရည်းစားကြား ၀င်ခဲ့လို့ ပြဿနာတစ်ခု ကြုံခဲ့ရဖူးတယ်။ ကောင်လေးက ကျွန်တော်နဲ့ သူငယ်ချင်းအရင်း။ ကောင်မလေးနဲ့လည်း သူငယ်ချင်းမိတ်ဆက်ပေးလို့ တော်တော်လေးခင်ပါတယ်။ တစ်နေ့ ကောင်မလေးက သူကျူရှင်တက်ရမှာမို့ စာတိုက်မှာ စာဝင်ထည့်ပေးပါတဲ့။ အဲဒါနဲ့ ကျွန်တော်ကလည်း ယူလာခဲ့တယ်။ စာအိတ်ကိုကြည့်တော့ နည်းနည်းထူးခြားနေသလို ခံစားမိတယ်။ စာအိတ်က အကြီးဖြစ်သလို မာတောင့်တောင့်နဲ့။ ပြီးတော့ လိပ်စာက ရန်ကုန်က ကောင်လေးတစ်ယောက်လိပ်စာ။ ဒါနဲ့ ကျွန်တော်လည်း ဖွင့်ဖောက်လိုက်တယ်။ တကယ်တော့ မလုပ်သင့်တဲ့အလုပ်ပါ။ ဒါပေမဲ့လည်း သူ့ကောင်လေးက ကျွန်တော့်သူငယ်ချင်းဖြစ်နေတော့ တစ်ခုခုလို့ ခံစားမိလို့ဖောက်ဖတ်လိုက်တာ။

ထင်တဲ့ အတိုင်းပါပဲ။ ရန်ကုန်ကတစ်ယောက်နဲ့ အီချင်တဲ့အနေအထား။ စာက ရှည်တဲ့အပြင် သူ့ဓာတ်ပုံပါ ထည့်ပေးထားသေးတယ်။ ဒါနဲ့ ကျွန်တော်က စာအတုတစ်စောင်လုပ်ပြီး အဲဒီလိပ်စာအတိုင်း ထည့်ပေးလိုက်တယ်။ အမှန်က စာထည့်ပြီးကြောင်း ဖြတ်ပိုင်းလေးလိုချင်လို့ လုပ်လိုက်တာ။ အဲဒီစာကို ကျွန်တော့်သူငယ်ချင်းကို ပြခဲ့တယ်။ မင်းသင့်တယ်ထင်လို့၊ ပြီးတော့ အကောင်းဆုံး ဖြေရှင်းနိုင်မယ်ထင်လို့ဆိုတဲ့ စကားတွေနဲ့ သူကို ပေးခဲ့တယ်။

သူတို့နှစ်ယောက် ပြဿနာတွေ တက်ကျပါတယ်။ ဒါပေမဲ့ နောက်ဆုံးတော့ ပြေလည်သွားကြပါတယ်။ မပြေလည်တာက ကျွန်တော်ပါ။ ဘာလို့လဲဆိုရင် ကောင်မလေးက ကျွန်တော့်ကို ကြည့်မရတော့သလို မယုံတော့ ပါဘူး။ (ဒါပေမဲ့ နောက်ဆုံးမှာတော့ နားလည်ပြီး ပြန်ခင်မင်ခဲ့ပါတယ်)။ အဲဒီကစလို့ ကျွန်တော် သူများ သမီးရည်းစား ကြားကိုယ့်ကိစ္စမဟုတ်ပဲ ကြားမ၀င်ဖို့ဆုံးဖြတ်ခဲ့တယ်။ ကိုယ်က သူတို့ကို ပြဿနာအကြီးတွေမဖြစ်စေချင်တဲ့ စေတနာနဲ့ ဆောင်ရွက်ခဲ့ပေမဲ့ နောက်ဆုံးမှာ ၀င်ပတ်သက်တာမကောင်းဘူးဆိုတဲ့ ကြောက်စိတ်လည်း ဖြစ်မိခဲ့တယ်။

ကျွန်တော့်စိတ်ထဲမှာလည်း ဒီအချိန် ဒီကာလအထိ ဘယ်သမီးရည်းစားတင်မဟုတ်ပါဘူး၊ မောင်နှမကြား၊ သူငယ်ချင်းတွေကြား၊ မိတ်ဆွေတွေအကြား ခင်မင်ပျက်စေ၊ ချစ်ခင်ခြင်းပျက်စေ၊ သွေးကွဲစေဆိုတဲ့ စိတ်မျိုး အနည်းငယ်မျှမရှိခဲ့ကြောင်း သစ္စာပြုဝံ့ပါတယ်။ ဘာလို့ ပြုဝံ့သလဲဆိုရင် ကျွန်တော်ကိုယ်၌က ခွဲခွဲခြင်း၊ ကွဲကွာခြင်း၊ အခင်အမင်ပျက်ခြင်းဆိုတဲ့ အရာတွေကို ခါးခါးသီးသီးမုန်းလို့ပါပဲ။ မလိုချင်လို့ပါပဲ။

ဘ၀ဖြတ်သန်းခဲ့ရတဲ့ ဒီနေ့ဒီအချိန်ထိ မိသားစုနဲ့ နေရတဲ့အချိန်ဆိုတာ ရှားပါးလှပါတယ်။ ၀န်ထမ်းဖြစ်တုန်းကလည်း မိသားစုတွေနဲ့ ခွဲရတယ်၊ သူငယ်ချင်းတွေနဲ့ခွဲရတယ်။ အိမ်ထောင်ကြပြန်တော့ ဇနီးမယားနဲ့ ခွဲနေရပြန်တယ်၊ သမီးလေးရလာတော့လည်း ခွဲနေရပြန်ပါတယ်။ ခွဲနေရချိန်တွေများလာတော့ ဒါဟာ ၀ဋ်ကြွေးတစ်ခုပါလား ဆိုတဲ့ အတွေးမျိုးဝင်မိတယ်။ ငယ်စဉ်က ငှက်ကလေးတွေ အသိုက်ကိုဖျက်ခဲ့တယ်။ ငှက်ကလေးတွေကို ဖမ်းခဲ့တယ်၊ အရင်ဘ၀တွေကလည်း ထပ်တူကံမျိုးတွေ လုပ်ခဲ့တဲ့ အကျိုးဆက်တွေရှိနေမှာ အမှန်။ ကျွန်တော် ခွဲခွာရခြင်းကို ရွံ့မုန်းလာမိတယ်။ ဒီတော့ ကိုယ့်ကြောင့် ဘယ်တော့မှ သူတစ်ပါး သတ္တ၀ါလေးတွေကအစ မခွဲခွာပါစေနဲ့ဆိုတဲ့ စိတ်မျိုးထားတဲ့အပြင် မကွဲကြပါစေနဲ့ဆိုတဲ့ မေတ္တာစိတ်မျိုးထားခဲ့ရိုးအမှန်။

အထူးသဖြင့် " ပိယေဟိ ၀ိပ္ပယောဂေါ ဒုက္ခော " ဆိုတဲ့ ချစ်ခင်ရသောသူနဲ့ ကွေကွင်းရခြင်းဆင်းရဲဆိုတာကို ကြောက်လွန်းလို့ပါ။ ချစ်ခင်ရသောသူဆိုတာ မိဘ၊ မောင်နှမ၊ သူငယ်ချင်း၊ မိတ်ဆွေ၊ သမီးရည်းစား အားလုံး အကျုံးဝင်မယ်ထင်ပါတယ်။ ဘယ်သူမှ ကွေကွင်းရခြင်းဆင်းရဲကို လိုချင်ကြမှာ မဟုတ်ပါဘူး။ ကွေကွင်းရခြင်းကို ကြောက်ကြမယ်ထင်ပါတယ်။

အမှန်အတိုင်း ကိုယ့်စိတ်ကိုယ် ၀န်ခံရရင် ခုတလော ကျွန်တော့်စိတ်တွေ မတည်ငြိမ်၊ ဂနာမငြိမ်မိတာ အမှန်ပါပဲ။ ဘာကြောင့်လဲဆိုရင် ငယ်ကချစ် နှစ်တစ်သောင်း မမေ့ကောင်းဆိုတဲ့ ငယ်ချစ်ဟောင်းနဲ့ ပြန်တွေ့နေရလို့ပါ။ ကျွန်တော် ဟိုး ခပ်ငယ်ငယ်ကတည်းက နှစ်နှစ်ကာကာချစ်ခဲ့ရသူပါ။ ခုအချိန်မှ ပြန်ဆုံတွေ့ကြရတာပါ။ ဒါပေမဲ့ အချိန်တွေက နှောင်းခဲ့ပါပြီ။ သူဟာ အိမ်ထောင်ဖြစ်သလို ကျွန်တော်ဟာလည်း အိမ်ထောင်ရှင်ဖြစ်လို့နေပါပြီ။

ဒီအချိန်မှာ မကျေမနပ်ဖြစ်နေတာကို ပြောပါဆိုရင် ရင်ခုန်တတ်စအရွယ်လို ခံစားနေမိတဲ့ နှလုံးသားကိုပါပဲ။ တကယ်ဆို ကိုယ့်အသက်အရွယ်အရ၊ ကိုယ့်ဘ၀ဖြတ်သန်းရတဲ့အခြေအနေအရ တည်ငြိမ်ဖို့သင့်လှပါပြီ။ ဒါပေမဲ့လည်း မတည်ငြိမ်ခဲ့ပါဘူး။ ဒီအချိန်မှာ လုံးဝမဖြစ်နိုင်တော့မှန်းသိတယ်။ ဒါကြောင့်လဲ နှလုံးသားဆိုတာကို စိတ်နဲ့ ဦးနှောက်နဲ့ ထိန်းချုပ်ခဲ့ကြပါတယ်။ ကျွန်တော် ဒုဿနသော အဖြစ်ကို ဘယ်တော့မှ အဖြစ်ခံမှာ မဟုတ်သလို သူတစ်ပါးရဲ့ မိသားစုဘ၀ကို ဖျက်ဆီးမှာမဟုတ်ပါဘူး။ ဘာလို့လဲဆိုရင် အေးချမ်းနေတဲ့ ကိုယ့်မိသားစုဘ၀လေးကိုလည်း အပျက်အစီးမခံနိုင်လို့ပါ။ အိမ်ထောင်တွေပျက်၊ လောကလူမှုဝန်းကျင်အလည်မှာ ဖောက်ပြန်မှုဆိုတဲ့ အမည်ဆိုးကြီးကို ကြောက်လို့ပါ။ ကြောက်တယ်။ ကိုယ့်ကြောင့် ဘယ်မိသားစုကိုမှလည်း ကွေကွင်း မခံနိုင်ပါ။ ဒါကြောင့်မို့ ပူလောင်လှတဲ့ ချစ်ခြင်းကို အေးချမ်းတဲ့ မေတ္တာတရားနဲ့ ငြိမ်းအေးစေခဲ့ပါတယ်။

ကိုယ့်နှမလေးတစ်ယောက်လို၊ ကိုယ့်သူငယ်ချင်းတစ်ယောက်လို၊ ကိုယ့်မိတ်ဆွေတစ်ယောက်လို သဘောထား နိုင်ခဲ့ပါတယ်။ အကယ်၍များ ရှေ့ဆက်လှမ်းခဲ့မယ်ဆိုရင် ကျွန်တော်ဟာ ဒီဘ၀တင်မဟုတ်ပါဘူး နောင်ဘ၀ အဆက်ဆက် ချစ်ခင်ရသူတွေနဲ့ ဆက်ပြီး ကွေကွင်းနေရဦးမယ်လို့ ကျွန်တော်ယုံပါတယ်။ ဒီဆင်းရဲကိုလည်း အကြိမ်ကြိမ် ခံစားနေရဦးမယ်လို့ ယုံပါတယ်။ 

ဒါကြောင့် ကျွန်တော်ကြောက်ပါတယ်။ သစ္စာဖောက်ဖျက်မှုကို ကြောက်တယ်။ စိတ်ဖောက်လွဲဖောက်ပြန်မှုကို ကြောက်တယ်။ မိသားစုတွေ ပြိုကွဲမှာကို ကြောက်တယ်။ သူတစ်ပါး မျက်ရည်တွေကို ကြောက်တယ်၊ " ပိယေဟိ ၀ိပ္ပယောဂေါ ဒုက္ခော " ဆိုတဲ့ ချစ်ခင်ရသောသူနဲ့ ကွေကွင်းရခြင်းဆင်းရဲကိုကြောက်ပါတယ်။
နောက်ဆုံး ကိုယ့်လိပ်ပြာကိုယ် ပြန်ကြောက်နေတဲ့ဘ၀မျိုးကို ပိုလို့ ကြောက်မိပါတယ်။ ကျွန်တော် ကြောက်တယ်။

-----------------------

မေတ္တာဖြင့်
မောင်ပိုင်(လေးမျက်နှာ)
၆-၆-၂၀၁၇ (၂၁၅၀)