" အလင်း "
--------------
(၁)
လောကကြီးသည် အမိုက်အမှောင်တို့ဖြင့် ဖုံးလွှမ်း၍ နေပေသည်။
ထိုအမိုက်အမှောင်တို့၏ အထဲတွင် ပိုးစုန်းကြူးမျှအလင်းရောင်ကဲ့သို့ အလင်းပြောက်တို့သည်ကား တချို့နေရာ၊ တချို့ဒေသတို့တွင် လင်းတစ်လှည့် မှိန်တစ်လှည့် ရှိပေ၏။
လောကတစ်ခွင်အတွက် အားကြီးသော အလင်းရောင်တစ်ခု ထွန်းလင်းဖို့သည် ကမ္ဘာနှင့်ချီပြီး ကြာမြင့် လေ၏။ ထိုအလင်းရောင်နှင့် ကြုံကြိုက်ဖို့သည်ကား ခက်ခဲလှစွာတကား။
(၂)
ဝန်းကျင်တစ်ခုလုံး မှောင်နေသည်။ မမြင်ရ။ မိုက်မှောင်နေအောင် မမြင်ရခြင်းတော့မဟုတ်။ ခပ်သဲ့သဲ့ အလင်းရောင်ကိုတော့ လှမ်းတွေ့ရသည်။ မျက်လုံးများကို သန့်စင်လိုက်သည်။ ဟုတ်သည် အလင်းရောင်၊ ပတ်ဝန်းကျင်၏ အမှောင်တိုက်ကို ဖြိုခွင်းနေသည့် အလင်းရောင်။
ခြေလှမ်းတို့ကို ခပ်သွက်သွက်လှမ်းလိုက်သည်။ အလင်းရောင်ဆီသို့ ဦးတည်လှမ်းလိုက်သည့် ခြေလှမ်း။ သွားရမည်။ အမှောင်ထဲ လျှောက်ရသည်ဆိုသည်က ဘယ်လိုမှ ကောင်းမွန်လှသည် မဟုတ်။ စမ်းတ၀ါးဝါးမဟုတ်။ စုံလုံးကန်းနေသည့် အနေအထား။
ဒီတော့ဖြင့် လှမ်းသည်။ ရှေ့ဆက်လှမ်းသည်။ လမ်းက ဖြောင့်သလား ကောက်နေသလားတော့ မသိပါ။ သို့သော် ကျွန်တော်ကတော့ ခြေလှမ်းမှန်မှန် လမ်းမှန်မှန်ဖြင့် လျှောက်နေသည်သာ။
(၃)
တစ်ခါတုန်းက မျက်မမြင်အဘိုးအိုတစ်ဦးသည် တောင်ဝှေးအကူအညီဖြင့် တစ်ရွာဝင်တစ်ရွာထွက် သွားလာနေသည်။ ရွာတစ်ရွာအရောက်တွင် ပတ်ဝန်းကျင်၌ မှောင်မိုက်နေပြီဖြစ်သည့်အတွက် အဘိုးအိုအား မီးအိမ်ဆွဲသွားရန် လူငယ်တစ်ဦးက အကြံပေးသည်။
" ငါက ကန်းနေတာပဲ မီးအိမ်ဆွဲသွားတော့ရော ဘာထူးမှာလဲ " ဟု အဘိုးအိုက ဆိုသည်။
" မီးအိမ်ကို ဆွဲပြီးလာတာကို မြင်ရရင် အဘိုးကို တခြားလူတွေ ၀င်မတိုက်အောင် ရှောင်သွားနိုင်တာ ပေါ့" ဟု လူငယ်က ပြန်ဖြေသည်။
လူငယ်၏ အကြံဥာဏ်ကို လက်ခံပြီး မီးအိမ်ကိုဆွဲလျက် ခရီးဆက်၏။ သို့သော် လမ်းခုလတ် တစ်နေရာတွင် လေအဝှေ့ကြောင့် မီးအိမ်ငြိမ်းသွားသည်ကို အဘိုးအို မသိခဲ့ချေ။ အမှောင်ရောက်လာ သော်လည်း ခရီးဆက်မြဲ ဆက်လျက်ပင်ရှိသည်။
" ဒုန်း "
တစ်နေရာအရောက်တွင် လူတစ်ဦးနှင့် တိုက်မိခြင်းဖြစ်သည်။ ထိုအခါ အဘိုးအိုက
" ဟေ့ ဘာလို့ဝင်တိုက်တာလဲ "
" မမြင်လို့ပါ အဘရယ်၊ လမ်းပေါ်မှာ မှောင်နေလို့ပါ၊ ပြီးတော့ အဘမီးအိမ်က ငြိမ်းနေပြီလေ "
" သြော် မီးအိမ်ငြိမ်းသွားပြီလား..အင်းလေ..နောက်ဆုံးတော့လဲ မမြင်တဲ့အကန်းဖြစ်ဖြစ် လူကောင်း ဖြစ်ဖြစ် အမှောင်ထဲကြ အတူတူပါပဲလား "
အဘိုးအိုကား မီးအိမ်ကို ချထားခဲ့ပြီး ခရီးဆက်ခဲ့လေတော့သည်။
(၄)
မဟာသက္ကရာဇ် ၁၀၃ ခုနှစ်၊ ကဆုန်လပြည့် ဗုဒ္ဓဟူးနေ့တွင် သိဒ္ဓတ္ထမင်းသားသည် လောကအတွက် အလင်းရောင်ကို ထွန်းညှိလိုက်ပါသည်။ ထိုအလင်းရောင်သည်ကား စကြ၀ဠာသိုက်တစ်သောင်းမျှမက ထွန်းလင်းတောက်ပတော်မူလေသည်။
ကိလေသာ အမိုက်မှောင်တို့မှ ရှင်းလင်းပယ်ခွာတော်မူ၍ ၃၁ ဘုံသား လူ၊ နတ်၊ သတ္တ၀ါတို့၏ ဥာဏ် အလင်းရောင်များအား လင်းလက်စေခြင်းငှာ အလင်းထွန်းညှိတော်မူပါပေ၏။
" အန္ဓီဘူတော အယံလောကော "
အယံလောကော= ဤလောကသည်၊ အန္ဓီဘူတော= အမိုက်မှောင်သဖွယ် ဖြစ်၏။
အမိုက်အမှောင်လောကကြီးအား ဓမ္မသစ္စာတရား အလင်းရောင်တို့ဖြင့် လင်းလက်စေခဲ့ပြီ။ စမ်းတ၀ါး သောလမ်းတို့ကို ထင်လင်းစေခဲ့ပြီ။ ကမ်းကိုလည်း မြင်စေခဲ့ပြီ။ ကူးခပ်နိုင်ရန်အတွက် လှေ၊ တက်တို့ကိုလည်း ထင်ရှားစေခဲ့ပါပြီ။
အစအဆုံးမဲ့လှသော သံသရာဝဲသြဃအတွင်းတွင် မျက်လုံးစုံမှိတ်ခူးခပ်နေသည်မှာ မမောနိုင်မပမ်းနိုင်၊ မရောက်နိုင်၊ မရပ်နိုင်။
မြတ်စွာဘုရားရှင်ထွန်းညှိလိုက်သော ဓမ္မအလင်းရောင်ကြောင့် ကမ်းကို မြင်နိုင်ပြီဖြစ်သည်။ ကျယ်ဝန်း လှသော သံသရာပင်လယ်၏ အနားသတ်ကို သိရှိရပြီဖြစ်ပါသည်။
" မိမိကိုယ်သာ အားထားရာ " ဟု ဆိုခဲ့ပြီ။ ကိုယ်တိုင်စိုက်ပျိုးသည့်အတိုင်း ရိတ်သိမ်းရမည်ဖြစ် ပါသည်။ အလင်းရောင်ရှိတုန်း ကြိုးစားကြမှသာလျှင် ခရီးလမ်းပေါက်မည်။ ဒီအမှောင် မှောင်သွားပါက မည်၍ မည်မျှ အမှောင်တိုက်ကြီးစိုးနေမည် မသိနိုင်။ သေချာသည်ကား ကြာဦးမည်။ ကမ္ဘာနှင့်ချီ ကြာမြင့်ပါ လိမ့်ဦးမည်။
(၅)
ပထမကမ္ဘာစစ်ကြီးတွင် ကျဆုံးသော စစ်သား ၁၀ သန်း၊ သေပြီဟု ယူဆခဲ့သော စစ်သား ၃ သန်းနှင့် အရပ်သား ၁၃ သန်းသေကြေခဲ့ကြသည်။ ထိခိုက်ဒဏ်ရာရသူ သန်း ၂၀၊ စစ်သုံ့ပန်း ၃ သန်း၊ စစ်ကြောင့် မိဘမဲ့ ကလေးဖြစ်သွားသော ကလေး ၉ သန်း၊ စစ်ကြောင့် မုဆိုးမဖြစ်သွားသော မိန်းမ ၅ သန်း ရှိခဲ့ကြသည်ဟု သိရ သည်။
ဒုတိယကမ္ဘာစစ်မတွင်သော လူသန်းပေါင်း ၅၅ သန်းမှ သေခဲ့ရသည်ဟု ဆိုပါသည်။
တတိယကမ္ဘာစစ်ကြီးသာ ဖြစ်ခဲ့ပါလျှင် မတွေးဝံ့စရာ။
လက်ရှိ ကမ္ဘာ့နိုင်ငံအသီးသီးတွင်လည်း ကျူးကျော်စစ်၊ မတရားစစ်၊ ပြည်တွင်းစစ်တို့ဖြင့် စစ်ပွဲများ ပုံသဏ္ဍာန်အလိုက် ဖြစ်ပျက်နေကြစဲပင်။ ထို့အပြင် လူမျိုး၊ ဘာသာ၊ အသွေးအရောင်တို့ကြောင့် လူအချင်းချင်း အိုးမည်းသုတ်ခံထားရသည့်ကြက်များနည်းတူ ခွပ်နေကြစဲ၊ တိုက်နေကြစဲ၊ ရန်ဖြစ်နေကြစဲပင်။
ရာစုများစွာ ဒီကမ္ဘာကြီးသည် ထမ်းပိုးထားရပြီးဖြစ်သည်။ ကျော်ဖြတ်ခွင့် ပေးထားရပြီးဖြစ်သည်။ ခေတ်အဆက်ဆက် သမိုင်းအဆက်ဆက်တို့နှင့်အတူ လူသားတို့၏ သွေးအစက်စက်တို့ဖြင့် တစ်နေ့ပြီး တစ်နေ့ တစ်နှစ်ပြီးတစ်နှစ်၊ တစ်ရာစုပြီး တစ်ရာစု ဖြတ်သန်းလာသော်လည်း လူသားတို့၏ ဥာဏ်အလင်းရောင် သည်ကား ခပ်ဝါးဝါးသာ ရှိခဲ့ကြခြင်းဖြစ်သည်။
လောဘ၊ ဒေါသ၊ မောဟတို့ကို ကျောပိုးထပ်ကြပ် သယ်ဆောင်လာခြင်းကြောင့် အမှောင်ထဲတွင် ၀န်ထမ်း၍ လျှောက်လှမ်းရသကဲ့သို့ရှိခဲ့သည်။
သို့သော် လွန်ခဲ့သော နှစ်ပေါင်း ၂၅၀၀ ကျော်တွင် မြတ်ဗုဒ္ဓက ဓမ္မဆီမီးကို ထွန်းညှိခဲ့ပေသည်။ ထို အလင်းရောင်သည် ယနေ့အချိန်ကာလအထိ ထွန်းလင်းတောက်ပစဲ။
နေရာတိုင်းတွင်တော့ မဟုတ်။ တချို့နေရာများကား မှောင်အတိ၊ တချို့နေရာများကား ခပ်ဝါးဝါး၊ တချို့နေရာများကား ထွန်းလင်းတောက်ပလျက်။
ကိုယ်ဘယ်အရပ်မှာ နေပါသနည်း။
(၆)
" ဤမီးတိုင် "
ဘုရားရှေ့ဝယ်
အငွေ့လှိုင်လှိုင်
နံ့ကြိုင်ကြိုင်ဖြင့်
တစ်တိုင်ဆီမီး
ထိန်ထိန်ညီးတည့်။
သူ့အလျှံမှ
တဖန်ကူးဘိ
သူငါညှိလည်း
မသိလျော့ရာ
ထိန်မြဲသာတည့်။ ။
စာဆိုရှင် ငွေတာရီ၏ ဤမီးတိုင်။ ဆီမီးတိုင်၏ အလင်းရောင်ဖြင့် ပတ်ဝန်းကျင် ထွန်းလင်းသလို ထို အလင်းရောင်ကို ကူးယူသွားခြင်းဖြင့် ဆီမီးတိုင်တွင် အလင်းရောင် လျော့မသွား။ အလင်းရောင် ပို၍ပင် ကျယ်ပြန့်စွာ ထွန်းလင်းလာနိုင်ပါသည်။
အလင်းရောင်ကို ထွန်းညှိသူရှိသည်။ အလင်းရောင်ကို ငြိမ်းသတ်သူရှိသည်။ အလင်းရောင်ကို ကွယ် ထားသူရှိသည်။ အလင်းရောင်ကို ကူးဆက်လင်းစေသူရှိသည်။
တချို့ကတော့ မိမိကိုယ်၌သာ မှောင်ရုံမျှမက ဘေးပတ်ဝန်းကျင်ကိုပါ မှောင်စေသည်။ တချို့ကတော့ မိမိရော ဘေးပတ်ဝန်းကျင်ပါ အလင်းရအောင် ဆောင်နှင်းပေး၏။
အလင်းရောင် ထွန်းညှိဖို့ လိုပါမည်။
(၇)
သဘာဝဓမ္မအလင်းရှိပင်ရှိသော်လည်း အတ္တအရောင်များကြောင့် မှောင်နေတတ်ပါသည်။
အတ္တမြူတို့ကို ဓမ္မအလင်းဖြင့် ဖယ်ခွင်းရမည်။
အလင်းရောင်ကောင်းကောင်းရမှသာလျှင် လမ်းဖြောင့်ဖြောင့်တန်းတန်းကို မြင်နိုင်ပါမည်။ လျှောက်နိုင်ပါမည်။
လမ်းဖြောင့်ဖြောင့်တန်းတန်းလျှောက်နိုင်မှသာ ခရီးပန်းတိုင်သို့ ဆိုက်ဆိုက်မြိုက်မြိုက် ရောက်သွားနိုင်မည် ဖြစ်ပါသည်။
ထို့ကြောင့် အလင်းရောင်လေး ရှိစဉ်ခိုက် ကြိုးစားလျှောက်လှမ်းကြဖို့ လိုပါလိမ့်မည်။
-------------
မေတ္တာဖြင့်
မောင်ပိုင်
၃၀-၅-၂၀၁၅
No comments:
Post a Comment