----------------
(၁)
စာရေးမယ်လို့ စိတ်ကူးနဲ့ Laptop လေးကိုဖွင့်လိုက်တယ်။ စာမရေးခင် စက်ထဲက သီချင်းလေးအရင်ဖွင့်ပြီး သိမ်းထားဖြစ်ခဲ့တဲ့
ဓာတ်ပုံလေးတွေကို ဆက်ကြည့်နေမိတယ်။ ဒါကလည်း
ထုံးစံလိုဖြစ်နေပြီ။ စာမရေးခင် ဓာတ်ပုံမှတ်တမ်းလေးတွေကြည့်ရတာက
စိတ်ထဲမှာ တစ်မျိုးတစ်မည် ခံစားမိပြီး ရေးစရာလေးတွေ ထွက်ထွက်လာတယ်လို့ ခံစားမိလို့ပါ။
နောက်ထပ် အကြောင်းလေးတွေလည်း ရှိတာပေါ့လေ။
မိသားစုနဲ့ခွဲနေရခြင်းက ကျွန်တော့ဘ၀မှာတော့
မစိမ်းလှတော့ဘူးဆိုရမယ်။ အသားတကျရှိနေပြီ
ဆိုစေဦးတော့ မိသားစုတွေ၊ သူငယ်ချင်းတွေကို သတိရမိစိတ်၊ လွမ်းတဲ့စိတ်အပြင် ဟိုး အတိတ်က
ဖြတ်သန်းကြီးပြင်းခဲ့တဲ့ ပုံရိပ်လေးတွေကို အမှတ်ရမိစိတ်တွေက Laptop ဖွင့်လိုက်ပြီ၊
ဓာတ်ပုံလေးတွေ ကြည့်မိပြီ ဆိုရင်ဖြင့် ထွက်ပေါ်လာတော့တယ်။
ဖြတ်သန်းခဲ့တဲ့ ဓာတ်ပုံအဟောင်းလေးတွေ၊ မိသားစု
သွားခဲ့လာခဲ့တဲ့ ခရီးအမှတ်တရပုံလေးတွေကို ခဏခဏပြန်ကြည့်မိခဲ့တယ်။ အိမ်ဝေးသူတစ်ယောက်အတွက် အလွမ်းပြေဆေးဆိုလည်း မမှားပေဘူးပေါ့လေ။
လွန်ခဲ့တဲ့ ဆယ်စုနှစ်တွေဆီကတော့ ဓာတ်ပုံလေးတွေရိုက်ပြီးတော့ ဆိုင်မှာ တကူးတကန့် သွားရွေး၊
ဓာတ်ပုံ ဖိုင်ထဲသေချာထည့်သိမ်းထားရတယ်၊ ထားကြတယ်။
အဲဒီဓာတ်ပုံမှတ်တမ်းဖိုင်ကြီးကို ဧည့်စားပွဲပေါ်မှာ၊ စာရေး စားပွဲပေါ်မှာ၊ အလှဆင်
ဗီရိုကြီးတွေထဲမှာ ထည့်ထားရင်း မိသားစုတွေ၊ သူငယ်ချင်းတွေ ဆုံတွေ့ကြခိုက် ပြန်ကြည့်လိုက်ကြ၊
ရှေးဖြစ်ဟောင်း နှောင်းဖြစ်တွေ ပြန်ပြောလိုက်ကြနဲ့ ဓာတ်ပုံထဲက အရိပ်တွေက အတိတ်တွေဆီ
ပြန်လည်သယ်ဆောင် သွားပေးကြတော့တယ်။
ဒီဘက်ခေတ်အခြေအနေမှာတော့ အလွယ်တကူ မှတ်တမ်းတင်ရိုက်ကူးလို့
ဖြစ်နေပြီဆိုတော့ကား စား၊ သောက်၊ သွားလာ ဘာလုပ်လုပ် ပုံလေးတွေ တဖျတ်ဖျတ်ရိုက် ပြီးတော့
မှတ်ဥာဏ်တို့သိုလှောင်ရာ အခန်းထဲကို ထည့်သွင်းသိမ်းကြတော့တယ်။ ပြီးတော့ ခဏခဏ ဖွင့်ကြည့်မိတော့တယ်။
ခုလည်း စာရေးဖို့ အကြောင်းအရင်းကနေ ဓာတ်ပုံတွေဆီ
စိတ်ညွတ်သွားရင်း အဟောင်းတွေကို၊ အတိတ်တွေ ပြီးတော့ မိသားစုကို လွမ်းမိနေလေပြီပေါ့။
(၂)
မမှတ်မိတဲ့ ငယ်ငယ်က ပုံတွေ၊ ခပ်ရေးရေးသာ
မှတ်မိတော့တဲ့ ခပ်ငယ်ငယ်ကပုံတွေ၊ အမြဲအမှတ်ရနေမိတဲ့ ကျောင်းတက်တုန်းကပုံတွေ၊ ပြီးတော့
မိသားစုပုံတွေ။ ကိုယ့်ဘ၀ရဲ့ တစ်ဆစ်ချိုး အချိုးအကွေ့ကို
ဖြတ်သန်းချိန်ရောက်တော့ ရောက်ရှိခဲ့ရာ၊ တာဝန်ကျခဲ့ရာ ဒေသတွေဆီမှာ ခင်မင်ခဲ့ကြတဲ့ သူငယ်ချင်းတွေနဲ့
ပုံတွေ၊ နေရာဒေသနဲ့ ရိုက်ကူးဖြစ်ခဲ့တဲ့ ပုံတွေကို တစ်ပုံချင်းစီ ကြည့်နေမိတယ်။
နောက် ထပ်ပြီး တစ်ဆစ်ချိုးကွေ့လို့ ဆိုရမဲ့
ကိုယ်ပိုင်မိသားစုဘ၀လေးပေါ့။ သမီးလေး ခပ်ငယ်ငယ်က
ပုံတွေ၊ ဗွီဒီယိုဖိုင်လေးတွေကို ဆက်ပြီးကြည့်နေမိတယ်။
အချိန်ရပြီဆိုတာနဲ့ မိသားစုသုံးယောက် တစ်နေရာရာကို
ခရီးသွားတတ်ကြတယ်။ မြစ်ကြီးနား၊ မိတ္ထီလာ၊ ပြင်ဦးလွင်၊
မန္တလေး၊ ပုဂံ၊ စစ်ကိုင်း၊ နတ်မောက်၊ ကျောက်ပန်းတောင်းစတဲ့ နေရာတွေကို ရောက်ခဲ့စဉ်က
မှတ်တမ်းတင်ဖြစ်တဲ့ မိသားစုပုံလေးတွေကို တစ်ပုံချင်းစီ တစ်ခုချင်းစီ ငေး ငေး ကြည့်နေမိတယ်။
ဘာပဲပြောပြော နေရာစုံမဟုတ်တောင် နေရာအတော်အသင့်ကို
ကျွန်တော်တို့ ရောက်ဖြစ်ခဲ့ပါလား ဆိုတာတွေးမိတယ်။
ဒါ့အပြင် ကျွန်တော့သမီးလေး ခုဆို အသက်က ငါးနှစ်ကျော် ခြောက်နှစ်အတွင်းသာ ရှိသေးတယ်ဆိုပေမဲ့
ကျွန်တော်တို့နဲ့အတူ သွားလေရာနေရာတို့ကို သူလိုက်ပါ ရောက်ရှိခဲ့ပြီ။
အသက်အရွယ်ရလာလို့ သူပြန်မှတ်မိချင်မှ မှတ်မိနိုင်ပေမင့်
ဒီဓာတ်ပုံတွေကတော့ သူ့ဘ၀အတွက် အမှတ်တရတွေ ဖြစ်နေမှာပါပဲလေ။
(၃)
ကျွန်တော်ငယ်ငယ်က ရောက်ဖူးခဲ့တဲ့နေရာတွေက
နည်းနည်းရယ်ပါ။ ရောက်ဖူးခဲ့တဲ့နေရာ နည်းနည်းကို
အဖေအမေက ပြောပေမယ့် မမှတ်မိတော့။
နည်းနည်းလေးအရွယ်ရလာပြီး ကိုယ့်ဘ၀ကို ကိုယ်တိုင်ထိန်းကျောင်းချိန်ကြမှ
နေရာဒေသတွေကို ရောက်ခဲ့တော့တယ်။
ကျွန်တော့သမီးလေးကတော့ ခပ်ငယ်ငယ်အရွယ်ကတည်းက
မြန်မာပြည်အထင်ကရနေရာ တော်တော်များများကို ရောက်ဖူးနေပြီ။ ဒါကလည်း သူ့ကုသိုလ်ကံကြောင့်ပဲ ဖြစ်မယ်ထင်ပါတယ်။
သူ့ရဲ့ ကံတရားတွေကြောင့် ဖြစ်မယ်။
တချို့ကလေးတွေကြတော့ နိုင်ငံခြားမှာ ပညာသင်ကြရ၊
မိဘနဲ့အတူ ဈေးဝယ်ထွက်ကြရ၊ မြန်မာပြည် အနှံ့အပြားကို အလည်အပတ်ထွက်ကြရတဲ့ ဘ၀တွေရှိကြသလို
တချို့ဘ၀တွေကတော့ မွေးဖွားပြီး ဘ၀တစ်ခု သေဆုံးသွားသည့်တိုင် ကိုယ့်မွေးဖွားရာအရပ်တွေကနေ
ဘယ်ဆီကိုမျှ မရောက်ခဲ့တဲ့ ဘ၀ပိုင်ရှင်တွေလည်း အများကြီး ရှိနေကြမှာ မဟုတ်ပါလား။
နေရာဒေသတွေကို ရောက်ဖူးခြင်း၊ မရောက်ဖူးခြင်းက
ဘ၀တွေအတွက် သိပ်တော့ထူးခြားလှတယ် မဆိုနိုင်ပေမဲ့ ရောက်ဖူးခြင်း၊ မရောက်ဖူးခြင်းရဲ့
နောက်ကွယ်က ကံတရားတွေကတော့ နည်းနည်းထူးခြားနေတယ်လို့ ထင်မိတယ်။ တစ်ခုတော့ရှိတော့ပေါ့လေ
သတ္တ၀ါမှန်သမျှ သံသရာက မကျွတ်သ၍ ဘ၀မျိုးစုံ၊ အရပ်မျိုးစုံမှာ ကျင်လည်ကြရမှာ အမှန်ပါပဲ။
(၄)
" ကံ ပစ်ချရာ ဘ၀ "၊ " ကံ
ဖန်တီးရာ ဘ၀ပေးအခြေအနေ "၊ " ကံ စီမံရာ အဖြစ်သနစ်တွေ " တဲ့။ ထင်ပေါ်ကျော်ကြားတယ်၊ အောင်မြင်တယ်၊ ကြီးပွားချမ်းသာတယ်၊
အာဏာကြီးတယ် ပြီးတော့ နိမ့်ကျတယ်၊ နွမ်းပါးတယ်၊ နွမ်းနယ်တယ် စတဲ့ စတဲ့ ကံကနေ ပေးစေလိုက်တဲ့
လူ့ဘ၀ကြီးထဲက ဘ၀ကိုယ်စီ။ ကံက ပိုင်းခြား ပေးလိုက်တဲ့ ဘ၀ကိုယ်စီ။ " ကံ သာလျှင် ကိုယ်ပိုင်ဥစ္စာရှိပေ၏ "
တဲ့။ ကိုယ်ပိုင်တဲ့ ကိုယ့်ကံလေးတွေအတိုင်း
ဘ၀အသက်ထက်ဆုံး သွားနေကြရတော့တာလား။
တိရစ္ဆာန်တွေမှာလည်း ချမ်းသာတဲ့ အိမ်မှာ မွေးထားတဲ့
တိရစ္ဆာန်နဲ့ လမ်းပေါ်မှာ ပိုင်ရှင် မဲ့ လွင့်နေရတဲ့ တိရစ္ဆာန် အခြေအနေခြင်း မတူနိုင်။
" ကံကောင်းလိုက်တာ "၊ " ကံဆိုးလိုက်တာ
" စတဲ့ ကံကောင်းခြင်း၊ မကောင်းခြင်းတွေကရော ကိုယ့်ဘ၀ကို ဇာတ်ညွန်းပေးတဲ့ ကံပဲလေလား။ " ကံ ထမ်းလာတာ မမြင်ရ၊ လှံထမ်းလာတာ မြင်ရ"
၊ " ကံမဲ့သူ ရှာမှီး၊ ကံကြီးသူ ခံစား"၊ " ကံဆိုးမသွားရာ မိုးလိုက်လို့ရွာ"၊
" ကံငင်ရာ ကုတင်ရွေ့" တဲ့။ ကံ တွေ
၊ ကံတွေ ဘ၀တွေကို အမျိုးမျိုး အဖုံဖုံ ဖန်တီးချယ်လှယ်နေတဲ့ ကံတွေ။
ဒီတော့ ကျွန်တော်တို့ ကံစီမံရာ ခံကြရပြီလား။ ကံ ကို မပြုပြင်တော့ပဲ ကံကို ပုံချကြတော့မှာလား။
(၅)
" ကံ = ကိုယ်၊ နှုတ်၊ စိတ် တစ်ခုခုဖြင့်
ပြုလုပ်သော အမှု။ ကောင်းကျိုး၊ မကောင်းကျိုးကို ဖြစ်စေသော အကြောင်း " လို့ မြန်မာအဘိဓာန်မှာ
ဖွင့်ဆိုပြထားပါတယ်။
" ကမ္မ(ပါဠိ)-ကံ- ပြုခြင်း၊ အမှု၊ အမှုသစ်၊
ကြိယာ၊ ကုသိုလ်အကုသိုလ်ကံ " လို့ ပါဠိ-မြန်မာအဘိဓာန်မှာ ဖွင့်ဆိုပြထားပါတယ်။
ဒီတော့ ကံဆိုတာ ကျွန်တော်တို့ပြုမူလိုက်တဲ့
အမှုတွေ၊ ကျွန်တော်တို့ လုပ်ဆောင်ထားတဲ့ အကျိုးဆက်တွေမဟုတ်ပါလား။ ကျွန်တော်တို့ ကိုယ်တိုင် စီရင်လိုက်တဲ့ အသီးအပွင့်တွေဟာ
အဲဒီကံဆိုတာပဲ မဟုတ်ပါလား။
ပြီးတော့ စေတနာဟာ ကံဖြစ်တယ်တဲ့။ ပြုလုပ်ဆောင်ရွက်ချက်တိုင်းမှာ ကျွန်တော်တို့ ထားရှိတဲ့
စိတ်စေတနာတွေဟာ ကျွန်တော်ဘ၀တွေကို ဖြစ်စေအပ်တဲ့ ကံတွေပါ။ ကောင်းမွန်မြင့်မြတ်တဲ့ စိတ်စေတနာတွေနဲ့ ကောင်းမွန်တဲ့
အလုပ်(ကုသိုလ်)တွေ လုပ်မယ်ဆိုရင် ကျွန်တော်တို့ဘ၀တွေက အေးချမ်း ကောင်းမွန်နေမှာပါ။ ထို့အတူ ယုတ်နိမ့်တဲ့ စိတ်စေတနာတွေနဲ့ ယုတ်ညံ့တဲ့
အမှု(အကုသိုလ်)တွေကို ကျူးလွန်ပြီဆိုရင်တော့ ဘ၀တွေက ပူလောင်နိမ့်ပါးနေမှာပါ။
ကျွန်တော်တို့ကို ဖန်တီးတဲ့ ကံ ကို ကျွန်တော်တို့
ပြန်စီရင်ကြရမယ်။ ကံကို ပြန်လည် စီမံကြရမယ်လေ။
လက်ရှိဖြစ်နေရတဲ့ ဘ၀တစ်ခုရယ်၊ နောင်မပြီးပြတ်နိုင်သေးတဲ့
ဘ၀တွေရယ်အတွက် လူမှုဝန်းကျင်အရ၊ လူတစ်ယောက်ရဲ့လူ့ကျင့်ဝတ်တန်ဖိုးအရ၊ ဘာသာတရားအရ ဆောက်တည်အပ်တဲ့
ကိုယ်ကျင့် တရား(သီလ)၊ အများအကျိုးပြုလိုစိတ်၊ တစ်ဦးစီ တစ်ဦးစီတိုင်းရဲ့ ကြီးပွားမှု၊
အောင်မြင်မှု၊ ချမ်းသာမှု တွေအပေါ် ချီးမြောက်ဝမ်းမြောက်လိုစိတ်၊ သတ္တ၀ါတွေအပေါ် အေးချမ်းသာယာနေစေလိုတဲ့စိတ်၊
ကိုယ့် စိတ်နှလုံး ကိုယ်ဖြူစင်ရှင်းသန့်လိုတဲ့စိတ်စတဲ့ မြင့်မြတ်သန့်စင်ကောင်းမွန်တဲ့စိတ်တွေဟာ
အမြဲတည်ငြိမ်/ တည်ကြည်ကိန်းအောင်းနေခြင်း(သမာဓိ)၊ ပြုလုပ်အပ်တဲ့အရာ၊ မပြုလုပ်အပ်တဲ့အရာ၊
ထားရှိသင့်တဲ့ စိတ်အနေ အထား၊ မထားရှိသင့်တယ်စိတ်အနေအထား၊ ဖက်တွယ်ထားသင့်တဲ့အရာ၊ မဖက်တွယ်ထားသင့်အရာ
စသဖြင့် ပြုအပ်၊ မပြုအပ်ကို ပိုင်းခြားသိခြင်း(ပညာ)တို့ဟာ ကျွန်တော်တို့ ပစ္စက္ခဘ၀အခြေအနေရယ်၊
နောင်ဆက်လက် ဖြစ်တည်နေဦးမဲ့ ဘ၀တွေအတွက် အထူးအရေးကြီးတဲ့ အရာတွေပါ။
ဆောက်တည်ခြင်း၊ တည်ကြည်ခြင်း၊ ပိုင်းခြားခြင်းတွေနဲ့
ကျွန်တော်တို့ရဲ့ ရှာဖွေမှုတွေ၊ ပြုမူမှုတွေ၊ ပြောဆိုမှု၊ တွေးကြံမှုတွေကို ထိန်းမတ်သွားရမှာပါ။
အဲဒီအခါ ကျွန်တော်တို့ဟာ " ကံ "
ကို လှပစွာ ဖန်တီးစီမံ နိုင်တော့မှာပါ။
ဒါမှသာ ကျွန်တော်တို့ စီမံသလို ကံက ကျွန်တော်တို့ကို
ပြန်လည် ချပေးရတော့မှာ မဟုတ်ပါလား။
(၆)
ငယ်စဉ်ကတည်းက နေရာစုံတော်တော်များများ ရောက်ခဲ့တဲ့
သမီးလေးက သူ သူ့ကံကို ကောင်းမွန်စွာ စီမံခဲ့လေသလား။ ဘယ်လို ဘယ်ပုံတွေ တည်ဆောက်ခဲ့ပါလိမ့်။
ကျွန်တော့် သမီးလေးက သူ့ကံကို သူဘယ်လို စီမံခဲ့သလဲ
ကျွန်တော်မသိနိုင်။ ကိုယ့်ကံကို ကိုယ် ဘယ်လိုစီမံခဲ့သလဲဆိုတာတောင် သိမှမသိနိုင်ပဲလေ။
တစ်ခုပဲ ရှေ့ဆက် ဘယ်လို စီမံသွားမလဲဆိုတာတော့ ကိုယ်သိနေဖို့ ပြုပြင် စီမံဖို့လိုမှာ
အမှန်ပါပဲလေ။
**************
--------------------
မောင်ပိုင် (လေးမျက်နှာ)
၁၈-၁၂-၂၀၁၅
(၂၂၁၆)သောကြာ၊ ရန်ကုန်။
No comments:
Post a Comment